श्रीपाद ब्रह्मे

मी मूळचा जामखेडचा. नगर जिल्ह्यातील या तालुक्याच्या ठिकाणाहून सुरू झालेला माझा प्रवास नगरमार्गे पुण्यात येऊन पोचला त्यालाही आता वीस वर्षे होऊन गेली. दहावीनंतर डिप्लोमा इंजिनीअरिंगकडे वळलेली पावलं 'चूक' लक्षात येताच योग्य मार्गाला लागली. 'नगर लोकसत्ता'मध्ये मुद्रितशोधक म्हणून सुरू झालेला हा प्रवास नंतर 'सकाळ'चा मोठा टप्पा (१३ वर्षे) घेऊन, आता 'महाराष्ट्र टाइम्स'च्या पुणे आवृत्तीत स्थिरावला आहे. पत्रकार म्हणून या काळात भरपूर शिकायला मिळालं. पुणे विद्यापीठाच्या वृत्तपत्र व संज्ञापन विभागात (रानडे इन्स्टिट्यूट) एक वर्षाची पत्रकारितेची पदवी घेतानाचा अनुभव अविस्मरणीय होता. पुढे 'सकाळ'तर्फे देशाच्या विविध भागांत आणि अगदी परदेशातही वार्तांकनासाठी जाण्याची संधी मिळाली. प्रशिक्षणार्थी पत्रकार ते मुख्य उपसंपादक असा तिथला प्रवास स्वतःला घडविणारा ठरला. नंतर २०१० मध्ये पुण्यात 'मटा' आला आणि या नव्या संधीनं खुणावलं. गेल्या सात वर्षांपासून इथंही शिकण्याची प्रक्रिया सुरूच आहे... दोन्ही ठिकाणी भरपूर लिहायला मिळालं. 'कॉफीशॉप' हे 'सकाळ'मध्ये, तर 'टी-टाइम' हे 'मटा'मध्ये लिहिलेलं अशी दोन्ही सदरे वाचकांना आवडली. शिकण्यापासून ते पत्रकारितेच्या नव्या मुलांना शिकवण्यापर्यंत आता हा प्रवास येऊन पोचला आहे... अर्थात रोजचं शिकणं सुरू आहेच.

लहानपणी जामखेडच्या लोकमान्य वाचनालयाचा संस्कार झाल्यामुळं वाचनाची गोडी लागली. त्यातूनच लहानपणापासूनच शब्दांचा लळा लागला. लिहायला आवडू लागलं. अभिव्यक्त होण्याचं हे माध्यमा सर्वांत जास्त भावलं. लिहिणं सहज-सोपं वाटत होतं पहिल्यापासून... सुदैवानं शब्दांसाठी कधी अडून राहावं लागलं नाही. वयाच्या सोळाव्या वर्षापासून अभ्यासाच्या वह्या मागच्या बाजूने जास्त भरत गेल्या... पुढे अपघातानं पत्रकारितेत आल्यानंतर पण लेखन करणं हा कामाचाच भाग होऊन गेला. अर्थात त्याचं ओझं कधीच वाटलं नाही. त्यामुळं कामही कधीच कंटाळवाणं झालं नाही... लिहीत गेलो, वाचकांना आवडत गेलं... बघता बघता चार पुस्तकंही प्रकाशित झाली... आता पाचवं पुस्तक लवकरच, म्हणजे २५ नोव्हेंबरला प्रकाशित होतंय... अजून बरंच काही लिहायचंय... पुष्कळ काही करायचंय....

गेल्या काही वर्षांत सोशल मीडियाचा बोलबाला आहे. ब्लॉगसारखं माध्यम आता सर्वांनाच उपलब्ध आहे. कार्यालयीन गरजेव्यतिरिक्त आपण स्वतःसाठीही अनेकदा लिहीत असतो. ते लेखन असंच कुठं कुठं सुटं पडून असतं. त्या लेखनालाही एक व्यासपीठ मिळावं म्हणून मी मे २०१३ मध्ये स्वतःचा ब्लॉग सुरू केला. 'ब्रह्मेवाक्य' असं चांगलं शीर्षकही सुचलं. खरं तर हे शीर्षक सुचलं म्हणून ब्लॉग सुरू केला, असंही म्हणता येईल. माझा मित्र आणि लोकप्रिय ब्लॉगर आशिष चांदोरकर यानंही ब्लॉग लिहिण्यासाठी मला प्रेरणा दिली... आता गेल्या चार-पाच वर्षांत या ब्लॉगवर १७० च्या आसपास लेख अपलोड केले आहेत. यातले बरेचसे आधी प्रसिद्ध झालेले लेख असले, तरी खास ब्लॉगसाठीही लिखाण केलंच. विशेषतः २०१४ नंतर मी सिनेमा परीक्षण अंकातून करणं थांबविल्यावर लोकाग्रहास्तव सिनेमावर ब्लॉगवर परीक्षणं लिहीत गेलो. ब्लॉगचं वैशिष्ट्य म्हणजे इथं जगभरातून प्रतिसाद येतो... मला ब्लॉगवर लिहिणं आवडतं... इथं लिहीत राहीनच...